Учество на општина Делчево на 4-тиот саем за рецептивен туризам во Охрид

Актуелно - Актуелности

Четврток, 20 Јануари 2011 08:42

Претставници од Општина Делчево учествуваа на 4-тиот Саем за рецептивен туризам кој се одржа во Охрид, од 17 до 19 јануари 2011 год. Саемот беше во организација на Агенцијата за поддршка и развој на туризмот во Република Македонија, под покровителство на Премиерот на Владата на Република Македонија, г-динот Никола Груевски.

Општина Делчево на овој саем се претстави со свој штанд заедно со општина Пехчево, во чии рамки на заинтересираните посетители на саемот им беше поделен промотивен материјал, од туристичката понуда на општина Делчево, беа прикажани промотивни видео материјали од општина Делчево, а  беа понудени и голем број на производи од богатиот асортиман на млекарницата „Рудине“ во Делчево, преку нивниот маркетинг агент во Охрид. Штандот на општина Делчево и на  општина Пехчево беше еден од најпосетуваните и предизвика огромно внимание на присутните, кои беа воодушевени од разновидноста, но и квалитетот на туристичката понуда на овие две општини. Заедничкиот настап на овој саем беше пречекан со воодушевување, со оглед на компетитивноста која постои помеѓу соседните општини на полето на туризмот во Македонија.

Во рамките на саемот беа остварени многубројни контакти со останатите излагачи, но и со тур-операторите кои беа присутни на ова саемско излагање и беа заинтересирани да се запознаат со Пијанечкиот регион, потенцијалите кои тој ги нуди во однос на туристичката понуда, како и можните облици на соработка кои општина Делчево ги нуди на тој план. За многу од странските, но и домашните тур-оператори регионот на Пијанец и општина Делчево е голема енигма во однос на туристичката понуда, така што најавената презентација за вториот саемски ден беше очекувана со  нетрпение и љубопитност.

Презентацијата насловена како "Пијанец-крстопат меѓу истокот и западот- Туристичка понуда на општина Делчево", беше презентирана во попладневната форумска сесија од вториот саемски ден и истата беше номинирана од страна на организаторите за една од најинтересните презентации на саемот. По завршувањето на презентацијата, на воодушевување на сите присутни во конгресната хала, настапи Фолклорната група „КОПАЧКА“ од с.Драмче, со дел од својот фолклорен репертоар и неповторливото и оригинално истоимено оро како името на групата "Копачка" -Првиот македонски фолклорен бренд-кој во иднина би го понел товарот на промоција на Пијанец и општина Делчево, во државни, балкански и светски рамки.

"Духот на Пијанец" го освои вниманието на сите присутни и достојно го презентираше живото културно наследство на овој микро-регион, богатство со кое Делчево е уникатно и препознатливо.

Наредниот ден учесниците на саемот беа поканети да присуствуваат на големата манифестација по повод Православниот христијански празник Водици крај пристаништето во Охрид.