Како што претходно беше најавено во организација на ЕЛС на Општина Делчево во соработка со Центарот за култура Н.Ј.Вапцаров и локални здруженија на граѓани се реализираа низа на активности за одбележување на "Првиот ден на Македонија во Европа без визи".

 

Во саботата (19.12.2009 год) утрото со почеток во 09:00 часот започна најавениот Планинарски марш на Планината Голак. Стартот беше пред Домот на културата во центарот на градот. Помеѓу присутните 25 учесници (граѓани, ученици, градоначалникот г-дин Горан Малешевски како и вработени

во Локалната самоуправа и училиштата во градот) на овој рекреативен настан видливо беше расположението и спремноста да се изведе, овој, сепак смел потфат да се искачат на врвот на Голак. Постои расположение и идеја оваа практика да продолжи и понатаму со рекреативни посети на сите позначајни места и локалитети во Општината Делчево, со цел на запознавањето на граѓаните на Делчево со убавините што им ги пружа Пијанец како и промоција на истите во пошироки рамки.

 

"Овој ден е особено значаен за Македонските граѓани кои на еден начин го добиваат заслуженото место во Европската унија, местото каде Македонија всушност и припаѓа"- рече пред почетокот на Маршот, градоначалникот на Општина Делчево г-динот Горан Малешевски. "Ова е историски ден за сите граѓани на Македонија и Општина Делчево. Работата и спроведените потребни реформи од страна на сите државни институции, од донесувањето на законите и нивно доследно имплементирање во практика, не е заслуга само на одредена група на луѓе, туку тоа е резултат на општа подреденост на сите граѓани на Македонија кон заедничката цел: целосно членство на Македонија во Евро-атланските интегративни процеси (НАТО и ЕУ)"-конкретизираше во својата изјава градоначалникот.

На присутните учесници во маршот им се поделија маички со грбот на Општина Делчево и знамето на Европската унија кои за оваа пригода специјално беа направени. Планинарскиот марш траеше 3.5 часа, а на крајот на врвот на Голак на учесниците им се подели топла напивка, како и закуска и други безалкохолни пијалоци.Воедно ова беше добра прилика за дружење на граѓаните на општината со  вработените во општинската администрација како и со градоначалникот кој со личен пример покажа дека спортско-рекреативниот дух треба да се негува и надградува постојано, не само помеѓу помладата генерација.

Во попладневните часови со почеток во 18:00 часот во Малата сала на Центарот за култура Н.Ј.Вапцаров (која навистина беше мала да ги собере сите гости и посетители), се одржа пригодна културно-уметничка програма во организација на Центарот за култура Н.Ј. Вапцаров во соработка со Локалната самоуправа на Општина Делчево. Најпрво до присутните стигнаа честитките за успехот на Македонија и нејзините граѓани ов европските стремежи на државата, од страна на директорот на Центарот за култура г-динот Љупчо Петровски.Настапија повеќе секции кои активно работат во рамките на програмските активности на Центарот за култура, како и уметници и групи од Делчево и Делчевско. Ваков масовен настан од поодамна немаше во Делчево што од една страна е за поздравување, но сепак и поттик за достигнување на повисоки стандарди во реализацијата на вакви културни настани.Делчево празнуваше на достоинствен начин заедно со сите граѓани на Македонија.