Добредојдовте на официјалната веб страна на Општина Делчево, со која сакаме да Ве запознаеме со Делчево, градот во најисточниот дел на државата, кој е на само десетина километри од соседна Бугарија. Сместен во Пијенчката котлина, по средниот тек на реката Брегалница и под падините на планината Голак, Делчево го живее новиот ден во новото време, длабоко поврзан со традицијата и историјата, носејќи ги белезите од минатото, црпејќи сила од храброста на разловечките востаници, и желбата за слобода на востаниците од Пијaнечката република. Со исконска гостопримливост и љубезност за сите гости и случајни минувачи, Делчево Ви порачува :„ Природните раритети, културно-историските вредности и живото културно наследство што се почитува и денес се доволен повод, Вие почитувани, да ја посетите Општина Делчево“. Гордоста на Источна Македонија, туристичко-рекреативниот центар Голак, со своите 1300 метри надморска висина, чие природно богатство е заштитено од државата, едноставно Ве пленат со живописната околина, густата борова шума и чистиот воздух. На традиционалниот верски празник св. Пантелејмон, на Голак се одржува големиот народен собир. Покрај манастирот се одржуваат Меѓународните Голачки фолклорни средби. Таа вечер, велат гостите, оздравуваат раните и се лекуваат болките, се спојува духовното и реалното, надежта и љубовта, нешто што треба само да се доживее под ѕвезденото небо на највисокиот врв на Голак. Под Голак е областа Пијанец, каде живееле старите Пеонци и оставиле огромно културно и историско наследство кое за жал не е сериозно истражувано, но потврдата за богатството, сепак, ја донесоа неколкуте археолошки истражувања. Најзначаен локалитет, кој со себе носи нов историски код, е археолошкиот локалитет „Могила“, каде е откриена единствената во Македонија, погребна бронзена ритуелна кочија од времето на Александар. Мора да го потенцирам и сензационалното откритие во 2007 год. Најстарата масовна гробница на животни во Европа, стара 10 милиони години, е откриена во селото Стамер на три километри од Делчево. Оквалификувано од еминентни палеонтолози од Франција и од Бугарија како единственото наоѓалиште на жирафа во Европа. Палеонтолошкотото и археолошкото богатство од Пијанечкиот терен се добра провокација за да го посетите Делчево. Живото културно наследство, со сите пораки од предците и адети се негува преку „Пијанечко-малешевската свадба“, обичајот под маски „Сурва“, и играта на најстарата фолклорна група во земјава „Копачката“ . . . Делчево со години расте и се развива. Од првобитното Василево, крстено по византискиот владетел Василиј, преку Царево Село во 14 век., Делчево од 1950 год. со гордост го носи името на великанот Гоце Делчев. Борејќи се со транзицијата, фаќајќи го чекорот на децентрализацијата, Делчево се движи со европско темпо. Ова е доволно како вовед, и како поттик да нe посетите и да го доживеете Делчево со современиот изглед и трендовите, и деталите од историјата кои се длабоко всадени во делчевското современие.
.jpg)
