Добредојдовте на официјалниот портал на Општина Делчево
Почитувани пријатели,
На почетокот дозволете ми да Ве поздравам од мое име и од името на Општина Делчево и да Ви посакам добредојде на официјалниот ВЕБ портал на општината. Секој посетител и добронамерник ќе има можност да се запознае со градот Делчево и општината и со она што го чини севкупното живеење на граѓаните од овој источен дел на Република Македонија. Ќе имате можност да го проследите континуираниот растеж на општината, нејзината историја и култура, нејзиното богато културно наследство, но и се она што се презема за во иднина и за подобар живот на делчевчани.
Познато е дека Пијанечката Котлина од памтивек во своите пазуви криела и крие многу тајни. Во некои од нив за момент можете да ѕирнете на ВЕБ страницата, но за некои од нив ќе морате да дојдете во ова питомо градче, да го посетите и заедно со нас и жителите на Пијанец да се прошетате низ нашата општина.
Со почит,
Горан Малешевски
Градоначалник на Општина Делчево
Промовирана стихозбирка од Ана Димитровска
ЗРА “Пијанечки глас“ од Делчево, синоќа во просториите на спомен-дом АСНОМ, организираше промоција на дебитантската стихозбирка од најмладиот автор од Делчево, што досега издал книга, 15-годишната Ана Димитровска. Во организацијата значаен придонес дадоа и вработените и соучениците на Ана од ОУ “Св. Климент Охридски“, од кои за почетоците во пишувањето и за наградите зборуваше нијзината наставничка Данка Атанасова, а другарчињата читаа стихови.
Се чисти коритото на реката Брегалница
Стартува акцијата на Владата на РМ и на ЕЛС Делчево за чистење на коритото на реката Брегалница. Носител на акцијата е Дирекцијата за заштита и спасување и Министерството за животна средина. Во акцијата се вклучени 5 градежни фирми и две Јавни претпријатија од општината и преку 100 работници од кои 64 се ангажирани преку Проект на Општина Делчево и Агенцијата за вработување.
Соопштенија
1. Им се соопштува на сопствениците на тешки товарни возила дека се забранува движење на возилата на дел од ул. “Македонска“ од почетокот на истата до раскрсницата со ул. “Вера Јоциќ“. 2. Се известуваат граѓаните на Општина Делчево дека поради невремето е предизвикано оштетување на дел од коловозите на улиците и затоа се предупредуваат учесниците во сообраќајот за внимателно движење по сообраќајниците. Музички хепенинг
Со порака да се чува и почитува околината, младите од Делчево одржаа музички хепенинг, како дел од проектот “Младите за чисто и еколошко Делчево“ што го спроведува ЗГ “Гласот на младите“. Во салата на спомен-домот АСНОМ, музиката, другарувањето, но и пораката од Проектот, ги слушнаа младите делчевчани. На хепенингот учествуваа надежни музички таленти од општината, групата RED ROSE, а свој сет имаше и DJ ZOZI.
Конкурс за избор на младенци за Четвртата “Пијанечко - малешевска свадба”
Врз основа на Годишната програма за култура за 2009 година на Општина Делчево, Општина Делчево и КУД”Гоце Делчев” од Делчево објавуваат конкурс за избор на младенци за Четвртата “Пијанечко - малешевска свадба” која ќе се одржи во Делчево на 19.09.2009 година.
Заинтересираните кандидати кои сакаат да се пријават треба да ги исполнуваат следните услови: • Да имаат склучено правен брак, да не се венчани во црква и да немаат организирано семејна свадбена веселба; • Еден од младоженците да е роден во Пијанечко - малешевскиот регион; • Младенците да бидат полнолетни. Доближување на културното богатство на Пијанец до ЕУ
Со цел идентификување на културното богатство на Пијанец и доближување до културните вредности до ЕУ, ЗРА “Пијанечки глас“ од Делчево на Денот на културата во Р. Македонија 10 јуни, го реализираше културниот настан “Сино, жолто, зелено - творам, постојам“. Тој е дел од истоимениот проект на Здружението, кој преку конкурсот од 2008 година, влезе во Годишната програма на Министерството за култура на Р. Македонија за 2009 година.
Се подготвува 4-тата Пијанечко-малешевска свадба
Општина Делчево и КУД “Гоце Делчев“ од Делчево ги започнаа подготовките на четвртата културна манифестација “Пијанечко-малешевска свадба“. Организациониот одбор го одржа првиот состанок на кој беа дефинирани активностите кои ќе значат и беспрекорна организација на културната традиционална манифестација која има за цел заживување и афирмација на свадбарските обичаи во Пијанец како и нивно ставање во функција на туристичка понуда од регионот. И оваа година “Пијанечко-малешевската свадба“ ќе биде збогатена со придружни манифестации, пред сè меѓународниот фолклорен фестивал, на кој е планирано учество на гости од Србија, Бугарија, Турција , како и од Македонија.
Специјална олимпијада во Делчево
Делчево беше домаќин на 7-та Специјална олимпијада во фудбал. Вчера на градскиот стадион над 250 лица со посебни потреби од Македонија, покажаа дека љубовта кон фудбалот не познава пречки и нема разлики. Се играше фудбал во три дивизии во зависност од категоријата, а за прв пат оваа година се играше и женски фудбал.
Промоција на Источниот плански регион во Делчево
Во четврток на 04.06.2009 година, со почеток во 13:00 часот во салата на спомен - домот АСНОМ, Делчево, ќе се одржи промоција на Програмата за развој на Источниот плански регион, на која ќе бидат претставени можностите за соработка со Центарот за развој на Источниот плански регион во имплементацијата на регионални проекти, согласно Програмата.
Започна изградбата на спортската сала во Делчево
Со поставување на камен-темелникот и со сите верски обреди денеска во Делчево и официјално започна изградбата на училишната спортска сала, како дел од Проектот на Владата за изградба и обновување на 145 спортски сали во државава. Салата е лоцирана во дворот на средношколскиот училишен центар „Методи Митевски - Брицо“. Првите лопати бетон во темелот ги фрлија министерот за образование, Перо Стојановски и градоначалникот на Делчево Горан Малешевски.
|
Граѓанскиот информативен центар подготвен за отворање
Граѓанскиот информативен центар во Делчево е подготвен да ги прими и опслужи своите први граѓани. Заврши опремувањето на просториите во Центарот, а деновиве завршија и обуките наменети за лицата кои ќе работат во овој Центар. Според првичните информации, свеченото отворање на овој Центар е планирано за 9-ти овој месец со што и практично ќе започне примената на едношалтерскиот систем на работа во Општина Делчево и ќе се придонесе во квалитетот на работата и ефикасноста на општинската администрација.
Се санираат штетите од невремето во Делчево
Силното невреме проследено со дожд и грмежи завчера предизвика оштетувања на коловозите од неколку улици во градот, како и поплавување на подруми и гаражи кои се наоѓаат на пониско ниво од улиците. Од поројните дождови поплавени беа подрумските делови од куќи на улиците “Маршал Тито“, “Сервисна“, “Даме Груев“ и “Никола Карев“, а оштетени се коловозите на улиците “Македонска“ и “Вера Јоциќ“ при што улиците се обележани со знаци за забрана на сообраќај на тој дел.
Студиско патување во Германија за регионален развој
Градоначалникот на Делчево, Горан Малешевски, заедно со своите колеги - градоначалници од Источниот и Југоисточниот регион, во периодот од 21-27 јуни ќе престојува во Германија на студиско патување за “Регионален развој преку регионален менаџмент“, а во организација на ГТЗ и ИНВЕСТ. Целта на посетата е првите луѓе на општините да се запознаат со регионалниот развој во Германија, како истиот функционира во оваа европска земја, да се запознаат со соработката со институциите на полето на регионалната соработка, но и да се видат добри практики кои можат да се имплементираат во регионалниот развој во земјава која е нова проблематика што треба да се промовира и практикува, а е согласно Законот за рамномерен регионален развој.
Делчево домаќин на меѓународната манифестација “Гоцеви денови“
Промоцијата на книгата “Историја на македонскиот народ“ во издание на Институтот за национална историја беше централна тема на годинешниве завршни денови на 43-та по ред меѓународна манифестација “Гоцеви денови“ која се одржа во Делчево. Во изданието на 340 страници се презентира историјата на македонскиот народ од праисторијата, преку антиката, па сè до Самитот на НАТО во Букурешт и Македонското малцинство во соседните земји.
Споменикот на Гоце Делчев во ново руво
Во пресрет на манифестацијата “Гоцеви денови“ основата на споменикот на Гоце Делчев покрај кејот на Брегалница доби нов мермер. На иницијатива на градоначлалникот Горан Малешевски, со средства од Буџетот на Општината, а во изведба на ЈПКД “Брегалница“ беше поставен прилепски мермер со што централното спомен-обележје на патронот Делчев доби обновен изглед.
Патеката на железната завеса ќе поминува низ Делчево
Македонија ќе биде во обединета Европа преку Патеката на железната завеса, која за прв пат ќе поминува низ Делчево, Берово и Струмица како дел од дестинацијата на 20 илјади европјани - велосипедисти кои секоја година ја промовираат пораката против поделбите потсетувајќи на времето кога железната завеса беше спуштена помеѓу Истокот и Западот.
Соопштенија
1. Се известуваат граѓаните на Општина Делчево дека во тек е дистрибуција на Решенијата за данок на имот за 2009 година. Рокот за плаќање на данокот за 2009 година пристигнува за наплата во средината на секое тромесечие. Граѓаните кои имаат неплатен стар долг, согласно добиената Опомена, обврската треба да ја измират во рок од 8 (осум) дена од денот на добивањето Опомената.
Кампања - Заедно до поубаво Делчево
Општина Делчево и оваа година во рамките на Кампањата - Заедно до поубаво Делчево, ќе ја спроведува акцијата “Избираме најубаво уреден двор“. Затоа, пријавете го Вашиот двор или дворот на Вашиот сосед кој секогаш го привлекува Вашето внимание!
Втора седница на Советот на Општина Делчево
Советот на Општина Делчево на 26.05.2009 година ја одржа својата Втора седница на која беа именувани членови и претседатели на постојаните Комисии на Советот, како и членови, претставници на Локалната самоуправа во Управните и Училишните одбори.
Комисијата за статут и прописи: Зоран Станоевски, претседател, членови: Светлана Ѓорѓиевска, Николче Трајановски, Снежана Ѓорѓиевска, Горан Георгиевски. Ренесанса на народната музика во Делчево
Вечерта на 21-ви мај во Делчево се славеше македонската изворна музика. Музика од заборавените народни инструменти, изворни и староградски песни од источниот дел на државава, изведувани од млади таленти, искусни и докажани инструменталисти и вокалисти, но и професионалци од штипскиот Факултет за музичка уметност. Сето тоа вклопено во рамката на културно - уметничка програма како финална промоција на Проектот "Народните ора и обичаи - извор на фолкорното и културното богатство на Источна Македонија“ реализирано од НУЦК "Н. Ј. Вапцаров" од Делчево.
|
